Туул, Сэлбэ гол орчмыг сайжруулах төслийн нэгжийг хотын дарга Д.Сумъяабазар өнгөрсөн намар байгуулж, уг төслийн нэгжийн зохицуулагчаар Б.Цэцэг хэмээх бүсгүйг ямар ч сонгон шалгаруулалтгүйгээр томилсон нь олны шүүмжлэлийн бай болсон.
Сэлбэ голын урсацыг сайжруулах, эргийг нь тохижуулах ажилд Д.Сумъяабазар нар БНХАУ-аас зээлж буй 60,000,000$ (190 орчим тэрбум төгрөг)-ийг зарцуулахаас нь гадна уг төслийн нэгжийн үйл ажиллагааны зардалд Нийслэлийн төсвөөс 3.1 тэрбумыг зарцуулах гэсэн оролдлогыг нь НИТХ төсөв хэлэлцэх үеэрээ дэмжээгүй.
Хотын дарга Д.Сумъяабазар Сэлбэ голын урсацыг сайжруулах төслийн нэгжийг олон нийт дэмжихгүй байна гэдэг үндэслэлээр татан буулгаж буйгаа хэвлэлийн төлөөлөгчөөрөө дамжуулан зарласан хэдий ч одоог хүртэл уг нэгжээ татан буулгах ажлыг хийхгүй байгаа аж.
Албан ёсоор уг нэгж татан буугдаагүй тохиолдолд Б.Цэцэг нарын хүмүүсийн улсаас авч буй цалин хангамж ч үргэлжилсээр байх бөгөөд БНХАУ-аас орж ирэх 60,000,000$-ийг захиран зарцуулах эрх нь хадгалагдсан хэвээр байх юм.
