Баянзүрх дүүргийн 11-р хорооны нутаг дэвсгэр, Богдхан уулын тусгай хамгаалалттай газар нутагт хамаарах Хүрэлтогоотын аманд 51 ширхэг тансаг зэрэглэлийн хаус барих ажил эхлээд хэд хонож байна.
Цэцэг ногоо нь алагласан байгалийн тансаг үзэмжийг булшилж, хүнд техникээр хөрсийг хуулж, газрыг сэндийчих ажил яг одоо туйлын эрчимтэй үргэлжилж байна.
Дархан цаазад Богдхан уулын ар хормойг хүчит техникээр ухаж, 51 тансаг зэрэглэлийн хаусыг барьж буй компани нь "Блэк энд вайт дрийм".
Энэ компанийн эзэмшигч нь ГОМБОСҮРЭН овогтой ЦОГЗОЛ.
"Блэк энд вайт дрийм" ХХК нь Байгаль орчин, аялал жуулчлалын яамнаас 6 га газрыг аялал жуулчлалын бүс болгоно. Улаанбаатар хотын иргэдэд зориулсан амралт зугаалгын бүс байгуулна хэмээн уг газрыг авсан боловч ачир дээрээ амралтын газар бус бүр 51 хаус барих архитектур төлөвлөлтийн даалгаврыг 2021 оны наймдугаар сарын 23-ны өдөр Мэргэжлийн зөвлөлөөр батлуулж аваад өдгөө барилгын ажлаа яралзтал хийж байна.
