Монгол Улсын Засгийн газар оюутан залуусын шаардлагыг хүлээн авч, төсвийн үргүй зардлуудаа тэвчиж, хэмнэлтийн горимд шилжих ажлыг эрчимтэй эхлүүлээд байгаа.
Гэтэл Засгийн газрыг үйл ажиллагааг эсэргүүцэж, Стандартчилал хэмжил зүйн газраас байгууллагын тугийг Монгол Улсын 18 аймгаар цэнгүүлэх аяныг уржигдар эхлүүлсэн байна.
Монгол Улсын төрийн туг (Есөн цагаан тугийг улсын баяр наадмаар цэнгүүлдэг)-ийг л цэнгүүлэх ёслол гэж байхаас биш байгууллагын туг цэнгүүлэх ёслол гэж та лав сонсоогүй байх.
Тэгвэл Стандартчилал хэмжилзүйн газрынхан байгууллагынхаа тугийг цэнгүүлэх ёслол гэгчийг санаачлан Ерөнхийлөгч У.Хүрэлсүх, Ерөнхий сайд Л.Оюун-Эрдэнэ нарын төрсөн нутаг Хэнтий аймгаас эхлүүлсэн бөгөөд байгууллагынхаа тугийг цэнгүүлж байна гэх нэрийн дор Хэнтий аймгийн стандартчилал хэмжилзүйн хэлтсийн дарга Ч.Пүрэвдоржоор ахлуулсан найман хүний бүрэлдэхүүнтэй баг Дорнод аймагт очин хонон өнжин архидаж байгаад авч очсон тугаа хүлээлгэн өгөөд уржигдар буцацгаажээ.
Хүн сонсоод итгэмгүй энэхүү утга учиргүй ажлыг Дорнод аймгийн стандартчилал хэмжилзүйн хэлтсийн дарга Н.Энхболд талархалтайгаар хүлээн авч, байгууллагын болон хэлтсийнхээ тугийг цэнгүүллээ гэдэг постыг албан ёсны пэйждээ байршуулсан байгааг та бүхэн харж байна.
Улмаар Дорнод аймгийн стандартчилал хэмжилзүйн хэлтсийн дарга Н.Энхболд туг цэнгүүлэх буухиаг үргэлжлүүлэн байгууллагынхаа 16 ажилтан албан хаагчдаас ердөө хоёрыг нь л жижүүрлүүлж үлдээгээд бусдыг нь дагуулан өчигдөр Сүхбаатар аймаг руу туг цэнгүүлэх ажлаар явсан бөгөөд одоог хүртэл буцаж ирээгүй байгаа аж.
Ямар ч ач холбогдолгүй, утга учиргүй энэхүү тэнэглэлийг хийхэд гарах зардлууд мэдээж улсын төсвөөс гарч буй бөгөөд ажлын цагаар албан үүргээ гүйцэтгэж байх ёстой төрийн албан хаагч нар аймаг аймаг дамжин туг цэнгүүлэх ёслол гэгчийг үйлдэж архидаж байгаатай хэн хариуцлага тооцох вэ?
