Нийслэлийн прокурорын газрын Ерөнхий прокурор асан Ш.Нямдоржийг өчигдөр АТГ-аас баривчилж, Чингэлтэй дүүргийн нэгдүгээр хорооны нутаг дэвсгэр, 24-р байранд байх орон гэрт нь нэгжлэг хийсэн. Түүнийг “Ариг” банктай холбоотой хэргээр баривчилсан гэх албан бус мэдээлэл байна.
АТГ-ынханд баривчлагдсан НПГ-ын Ерөнхий прокурор асан Ш.Нямдорж ямар хэмжээний хөрөнгө зөөртэй болохыг та бүхэнд хүргэе.
Тэрбээр 2021 оны хоёрдугаар сард АТГ-т гаргасан Хөрөнгө орлогын мэдүүлэгтээ:
Өөрийн орлогыг 41.6 сая, гэр бүлийн гишүүний орлогоо 36.9 сая хэмээн мэдүүлжээ. Мөн 240 сая төгрөгөөр үнэлэгдэх хоёр орон сууц, 30 сая төгрөгийн үнэ бүхий Тоёота Хариэр маркийн автомашин, 3 сая төгрөгөөр үнэлэгдэх 0.7 га газартай хэмээн мэдүүлсэн байв.
Ш.Нямдорж прокурор дотоодын банк санхүүгийн байгууллагад 28.3 сая төгрөгийн хадгаламжтай, ямар нэгэн компани хуулийн этгээдэд ямар ч хувьцаагүй хэмээн мэдүүлгээ гаргаж байжээ.
Шаравдоржийн Нямдорж прокурор 2019 оны аравдугаар сарын 02-ны өдөр Нийслэлийн прокурорын газрын Ерөнхий прокуророор томилогдож байсан бөгөөд 2021 оны гуравдугаар сарын 31-ний өдөр АН-ын дарга С.Эрдэнэд хууль бусаар хилс хэрэг үүсгэсэн гэх асуудалд нэр холбогдон албан тушаалаасаа бууж байв.
