Монгол Улсын Шадар сайд С.Амарсайханы хамаарал бүхий "Зүүнбаян рефайнери" ХХК 2017 онд төрийн эрх бүхий байгууллагын зөвшөөрөлгүйгээр "Их тэнгэр вилла" хэмээх 50 айлын таун хаусыг барихын тулд Туул голын эрэг дагуух олон мянган бургасыг шудаж байлаа. Уг ноцтой асуудлыг хэвлэл мэдээллийн байгууллагууд хийгээд олон нийт хүчтэй эсэргүүцсэний эцэст уг барилгын ажлыг зогсоож, "Зүүнбаян рефайнери" ХХК-д аялал жуулчлалын зориулалтаар олгосон газрын эрхийг цуцлуулж байв. Гэвч С.Амарсайхан нар зүгээр суусангүй, Байгаль орчин, аялал жуулчлалын сайд Д.Сарангэрэлээр цуцлагдсан газрынхаа эрхийг сэргээлгэж, Туулын эрэг дагуу тусгай хамгаалалттай бүсэд 50 айлын таун хаус барих ажлаа эхлэх нь хэзээ мөдгүй болоод байна. Монгол Улсын хууль тогтоомжийг уландаа гишгэж, байгаль орчинд онц их хэмжээний хохирол учруулж барьсан уг бетонон ширэнгийг нурааж, уг газрыг сэргээн тохижуулж, иргэдэд нээлттэй аялал жуулчлалын бүс болгох боломж одоо ч гэсэн байгаа бөгөөд үүнд иргэд та бүхний дэмжлэг маш хэрэгтэй байгаа билээ.
