Энэ хатагтай бол Туулын бургасыг олон мянгаар нь шудсан "Зүүнбаян рефайнери" ХХК-ийн цор ганц эзэмшигч Ишбал овогт Уламбаярын Ундармаа мөн.
Тэрбээр 2005 онд АНУ-ын Де Врай их сургуульд Бизнесийн удирдлагын магистрийн зэрэг хамгаална хэмээн Боловсролын зээлийн сангаас 16,000 ам.долларын зээл авангуутаа ор сураггүй алга болсон хүмүүсийн нэг.
Тэрбээр "Зүүнбаян рефайнери" хэмээх компанийг 2021 онд аав Сайнбуянгийн Уламбаяраасаа бэлэглэлийн гэрээгээр шилжүүлэн авсан. "Зүүнбаян рефайнери" компани Туул голын бургасыг хядаж бетонон ширэнгэ барьсан, мөн дээрээс нь Peave bridge зочид буудлыг эзэмшдэг асар их мөнгөлөг компани.
Ийм баян тансаг хүн атлаа тэрбээр Боловсролын зээлийн сангаас авсан зээлээ төлсөнгүй. Амьдралын боломж муутай бусад хүүхдүүдэд боломж олгохыг ч хүссэнгүй.
Би дөнгөж сая У.Ундармааа захирал руу залгаж "Та боловсролын зээлийн сангаас авсан 16,000 ам.долларын зээлээ яагаад төлөхгүй байгаа юм бэ" гэж асуусан чинь "Би тэгж яривал тэр сургуульдаа сураачгүй. Нэгхэн семистр суунгуутаа чөлөө аваад буцаад ирсэн хүн. Тэгээд ч би чамд яагаад төлөхгүй байгаа талаараа тайлбар өгөхгүй. Би Боловсролын зээлийн сан дээр ойрын үед очиж тайлбараа өгнө" гэж даналзав.
Тайлбар өгөх бус зээлээ л төлчихвөл уг нь болно л доо. Түүний авга ах нь Шадар сайд Сайнбуянгийн Амарсайхан учраас бусад зээлдэгч шиг зээлээ төлөхгүй гэж хэлж байгаа юм уу бүү мэд.
