Энэхүү нэвтрүүлэг гарсны дараа “Ачит Ихт” ХХК өөрийн албан ёсны хуудсаараа мэдэгдэл гаргаж, Эрдэнэт үйлдвэрт өөрийн хувьцааныхаа 34 хувийг үнэ төлбөргүйгээр шилжүүлэн өгөхөд бэлэн байгаа гэдгээ мэдэгдлээ.
“Ачит Ихт” ХХК нь Эрдэнэт үйлдвэртэй 2010, 2013 онуудад гэрээ байгуулж, тус үйлдвэрээс гарсан зэсийн агуулга бүхий овоолгыг ашиглах эрхтэй болсон бөгөөд овоолгыг нь ашиглаж, катодын зэс олборлож буйнхаа төлөө компанийнхаа 34 хувийн хувьцааг үнэ төлбөргүйгээр өгнө хэмээн тохирсон байдаг.
Гэвч яг үйлдвэр ашиглалтад орох үед “Ачит Ихт” ХХК-ийн зүгээс арга заль хэрэглэж, үйлдвэрээ асар их зээлтэй, ашиггүй хэмээх суртал ухаалга нөлөөлөл явуулж, улмаар 34 хувийн хувьцаагаа Эрдэнэт үйлдвэрт өгөөгүй юм.
“Ачит Ихт” ХХК өнгөрсөн 10 жилийн хугацаанд Эрдэнэтийн хоёрдугаар овоолгоос 96 мянган тонн катодын зэс үйлдвэрлэж, нийт 1.6 их наяд төгрөгийн борлуулалтын орлого хийсэн байдаг юм.