Өнөөдөр Дархан-Уул аймаг дахь Захиргааны хэргийн анхан шатны шүүх хуралдаж “Залуучууд театрын даргаар МУГЖ Н.Энхбатыг томил” гэсэн шийдвэрийг мөн гаргасан байна.
Шүүх яагаад ийм шийдвэр гаргасны учрыг тодруулбал "Дархан-Уул аймгийн Залуучууд театрын даргын нээлттэй сонгон шалгаруулалт 2025 оны долдугаар сард болоход МУГЖ, нэрт дуучин Насанцогтын Энхбат оролцож нэгээр шалгарч байжээ.
Гэвч уг сонгон шалгаруулалтын дараа "Би хөгшин хүнтэй хамтарч ажиллахгүй" хэмээн Дархан-Уул аймгийн Засаг дарга Б.Азжаргал мэдэгдэж, МУГЖ Н.Энхбатыг томилохгүй өнөөдрийг хүрсэн байна.
Өнгөрсөн хугацаанд Төрийн албаны зөвлөлөөс удаа дараа Дархан-Уул аймгийн Засаг дарга Б.Азжаргал руу албан бичиг илгээж, “МУГЖ Н.Энхбатыг Залуучууд театрын даргаар томил” хэмээн мэдэгдсэн боловч тэрбээр Төрийн албаны зөвлөлийн шаардлагыг биелүүлээгүй байна.
Иймд арга буюу МУГЖ Н.Энхбат Захиргааны хэргийн анхан шатны шүүхэд гомдол гаргаж ялалт байгуулжээ". Харин Дархан-Уул аймгийн засаг дарга Б.Азжаргал шүүхийн шийдвэрийг биелүүлэх эсэх нь одоогоор тодорхойгүй байна.
Монгол Улсын Үндсэн хуульд заасны дагуу бусдыг нас хүйс, арьсны өнгөөр ялгаварлахыг хориглодог бөгөөд Төрийн үйл ажиллагааны үндсэн зарчим нь хууль дээдлэх ёс юм.
