БШУЯ-ны харьяа Монгол-Оросын хамтарсан гуравдугаар сургуулийн захирал Ж.Соронзонд АТГ-аас хэрэг бүртгэлийн хэрэг нээн шалгаж эхэлжээ.
Ж.Соронзон нь албан тушаалын эрх мэдлээ урвуулан ашиглаж, өөрийн төрсөн дүү Ж.Содбилэгтийнхээ нэр дээр бүртгэлтэй “Эрхга” ХХК-тай “Түрээсийн гэрээ” байгуулж, 2015-2021 оныг хүртэлх хугацаанд 46 удаагийн гүйлгээгээр 5.8 тэрбум төгрөгийг сургуулийнхаа данснаас шилжүүлсэн асуудлыг хэд хоногийн өмнө илчилсэн нэвтрүүлгийг бид бүхэн бэлтгэж, улмаар Ж.Соронзонг шалгуулах хүсэлтээ АТГ-т гаргаад байсан юм.
АТГ-ын комиссар н.Эрхэмбаатар Ж.Соронзонгийн авлига, албан тушаалын гэмт хэргийг материалжуулан шалгаж байгаа бөгөөд авлигын хэргээс нь гадна гэмт хэргийн нотлох баримтыг устгасан байж болзошгүй асуудлыг нь ч давхар шалгаж байгаа юм байна.
