Монгол Улсын төрийн өмчид бүртгэлтэй МОХС-ийн хичээлийн байр, багш нарын амьдардаг байрыг ОХУ-д үнэ төлбөргүй шилжүүлж өгөөч гэдэг албан бичгийг "Дэлхийн боловсролыг таны хүүхдэд" ГҮТББ-аас өчигдөр УИХ-д илгээсэн нь ихээхэн шүүмжлэл дагуулж буй.
Уг албан бичигт гарын үсэг зурсан Төмөрбаатарын Бат-Эрдэнэ гэгч бол өмгөөлөгч хүн бөгөөд Ж.Соронзонг тойрон хүрээлэгчдийн нэг гэдгийг эх сурвалж хэллээ.
Хамгийн сонирхолтой нь "Дэлхийн боловсролыг таны хүүхдэд" ГҮТББ-ыг 13 эцэг, эх нийлж үүсгэн байгуулсан байх бөгөөд уг байгууллагаа УБЕГ-т Ж.Соронзонгийн төрсөн өдөр (2022.09.27) бүртгүүлсэн байгаа нь анхаарал татав.
Тус төрийн бус байгууллага хэд хоногийн өмнөөс МОХС-д сурдаг хүүхэд бүрээс жилийн хураамж хэмээн 30,000 төгрөгийг хурааж эхэлсэн бөгөөд тус сургуульд сурдаг 2800 орчим хүүхдээс уг мөнгийг татсан тохиолдолд нийт 84,000,000 орчим төгрөг цуглах ч тооцоо гарчээ.
"Дэлхийн боловролыг таны хүүхдэд" ГҮТББ-ынхан "Бид сурагчдынхаа сурч боловсрох эрхийг хамгаалах, сургуулийнхаа хэвийн үйл ажиллагааг хангах чиглэлээр ажиллана" гэж хэлж дээрх мөнгийг хураадаг атлаа сурагчдынхаа төдийгүй улс орныхоо эсрэг үйл ажиллагаа явуулсанд гомдолтой байгаагаа эцэг, эхчүүд хэлж байна.
